வைகோ உள்ளே.. CPI வெளியே... சி எம் விஜய் போடும் கூட்டணி பிளான்?

தமிழக அரசியலில் செப்டம்பர் 9ஆம் தேதி நடைபெற உள்ள தவெக ஆதரவு மற்றும் கூட்டணிக் கட்சிகளின் ஆலோசனைக் கூட்டம் நாளுக்கு நாள் முக்கியத்துவம் பெற ஆரம்பித்துள்ளது. கூட்டணிக்கு அதிகாரப்பூர்வ பெயர் வைப்பது, ஒருங்கிணைப்புக் குழுவை உருவாக்குவது, அடுத்தடுத்த தேர்தல்களுக்கான பொதுவான அரசியல் பாதையை முடிவு செய்வது என பல முக்கிய விஷயங்கள் இந்தக் கூட்டத்தில் பேசப்பட உள்ளன. ஆனால் கூட்டத்திற்கு இரண்டு நாட்களே இருக்கும் நிலையில் யார் விஜயுடன் முழுமையாக இணையப் போகிறார்கள், யார் வெளியிலிருந்து ஆதரவு மட்டும் கொடுக்கப் போகிறார்கள் என்ற புதிய அரசியல் கணக்கும் உருவாகியுள்ளது.

இதில் முதலில் தெளிவான முடிவை எடுத்திருப்பவர் மதிமுக பொதுச்செயலாளர் வைகோ. செப்டம்பர் 9 ஆலோசனைக் கூட்டத்தில் மதிமுக பங்கேற்கும் என்று அவர் தெரிவித்துள்ளார். அதோடு விஜய் தலைமையிலான அரசின் செயல்பாடுகள் குறித்தும் வைகோ சாதகமான கருத்துகளை தெரிவித்திருப்பது கவனிக்கத்தக்கது. இதனால் இதுவரை தவெக அரசுக்கு ஆதரவாக இருந்து வந்த மதிமுக, இனி விஜய் தலைமையிலான அதிகாரப்பூர்வ கூட்டணியின் முக்கியமான கட்சியாக மாறுகிறதா என்ற எதிர்பார்ப்பு ஏற்பட்டுள்ளது.

ஆனால் இந்திய கம்யூனிஸ்ட் கட்சி இதற்கு நேர்மாறான சிக்னலை கொடுத்துள்ளது. தவெக அரசை ஆதரிப்பது வேறு, தவெக தலைமையிலான கூட்டணியில் இணைவது வேறு என்ற நிலைப்பாட்டையே அந்தக் கட்சி தொடர்ந்து முன்வைக்கிறது. CPI மாநிலச் செயலாளர் மு.வீரபாண்டியன், தாங்கள் தவெக கூட்டணியிலோ அமைச்சரவையிலோ சேரப்போவதில்லை என்று தெளிவுபடுத்தியுள்ளார். பாஜகவுக்கு எதிரான ஜனநாயக சக்திகளை ஒன்றிணைப்பதும், இடதுசாரி அரசியலை வலுப்படுத்துவதும்தான் தங்களது நோக்கம் என்றும் அவர் தெரிவித்துள்ளார்.

ஆனால் இங்கே அதிக சுவாரசியத்தை ஏற்படுத்துவது மார்க்சிஸ்ட் கம்யூனிஸ்ட் கட்சியின் நகர்வுதான். சமீபத்தில் இடதுசாரி மாணவர்களை கண்காணிக்கும்படி வெளியான சுற்றறிக்கை விவகாரத்தில் தவெக அரசை CPM கடுமையாக விமர்சித்திருந்தது. ஆனால் தவெக அமைச்சர்கள் நேரில் சந்தித்து அந்த சுற்றறிக்கை அரசின் உத்தரவால் வெளியிடப்படவில்லை என்றும், அதிகாரிகள் மட்டத்தில் நடந்த தவறு என்றும் விளக்கம் அளித்த பிறகு CPM தனது நிலைப்பாட்டை சற்று மென்மையாக்கியிருக்கிறது. இதனால் செப்.9 கூட்டத்தில் CPM பங்கேற்குமா என்ற எதிர்பார்ப்பு அதிகரித்துள்ளது.

இதுவே விஜயின் தற்போதைய கூட்டணி பிளானில் முக்கியமான பகுதியாக பார்க்கப்படுகிறது. தற்போதைய அரசுக்கு ஆதரவளிக்கும் கட்சிகளை வெறும் “ஆதரவு கட்சிகள்” என்ற நிலையில் வைத்திருப்பதை விட, ஒரே பெயர் மற்றும் ஒரே அரசியல் திட்டத்தின் கீழ் கொண்டு வந்தால் அடுத்த உள்ளாட்சித் தேர்தல் மற்றும் 2029 நாடாளுமன்றத் தேர்தலுக்கு பெரிய அமைப்பு பலம் கிடைக்கும். அதற்காகவே CPI, CPM, மதிமுக உள்ளிட்ட கட்சிகளை தனித்தனியாக சந்தித்து தவெக அமைச்சர்கள் நேரடியாக அழைப்பு விடுத்துள்ளனர்.

ஆனால் இந்த கூட்டணி விரிவாக்கத்தில் விஜய்க்கு ஒரு பெரிய சவாலும் இருக்கிறது. காங்கிரஸ், விசிக, மதிமுக, இடதுசாரிகள் என ஒவ்வொரு கட்சிக்கும் தனித்தனி அரசியல் அடையாளமும் தேசிய அளவிலான கணக்கும் உள்ளது. குறிப்பாக 2029 பிரதமர் வேட்பாளர் விவகாரத்தில் ராகுல் காந்திதான் தங்களது முகம் என்று காங்கிரஸ் ஏற்கெனவே கோடு போட்டுள்ளது. மறுபக்கம் தவெக வட்டாரத்தில் விஜயை தேசிய அரசியலுக்கு முன்னிறுத்தும் பேச்சு எழ ஆரம்பித்துள்ளது. இதனால் அனைவரையும் ஒரே கூட்டணிக்குள் கொண்டு வந்தாலும், அதன் தலைமையும் எதிர்கால இலக்கும் எப்படியிருக்கும் என்பதுதான் அடுத்த பெரிய கேள்வி.

செப்டம்பர் 9 கூட்டத்தில் கூட்டணியின் பெயர் மட்டுமல்லாமல் அதன் அமைப்பு குறித்தும் முடிவுகள் வெளியாகலாம் என்று தகவல்கள் தெரிவிக்கின்றன. விஜய் கூட்டணியின் முக்கிய தலைமைப் பொறுப்பில் இருப்பது இயல்பானதாக இருக்கும் நிலையில், வைகோ போன்ற அனுபவம் வாய்ந்த தலைவர்களுக்கு ஒருங்கிணைப்புப் பொறுப்பு கிடைக்கலாம் என்ற பேச்சும் அரசியல் வட்டாரத்தில் உள்ளது. ஆனால் இதுவரை எந்தப் பொறுப்பும் அதிகாரப்பூர்வமாக அறிவிக்கப்படவில்லை. இறுதி முடிவு கூட்டணிக் கட்சிகளுடன் ஆலோசித்த பின்னரே வெளியாகும்.

அதனால் விஜய்க்கு தற்போது இருக்கும் மிகப்பெரிய சவால் புதிய கட்சிகளை கூட்டணிக்குள் அழைத்து வருவது மட்டும் அல்ல. காங்கிரஸின் தேசிய அரசியல் கணக்கு, இடதுசாரிகளின் தனித்துவம், விசிகவின் சமூகநீதி அரசியல், வைகோவின் நீண்டகால அரசியல் அனுபவம் ஆகிய அனைத்தையும் ஒரே குடையின் கீழ் எந்த முரண்பாடும் இல்லாமல் கொண்டு செல்வதுதான் உண்மையான அரசியல் டெஸ்ட்.

வைகோ ஏற்கெனவே உள்ளே வர சிக்னல் கொடுத்துவிட்டார்... CPI மட்டும் கதவை மூடியிருக்கிறது... CPM இன்னும் முடிவு சொல்லவில்லை.

செப்டம்பர் 9ஆம் தேதி இந்த மூன்று நிலைப்பாடுகளும் மாறுமா? அல்லது விஜய் தலைமையில் உருவாகும் புதிய கூட்டணி ஆரம்பத்திலேயே சில கட்சிகளை வெளியே வைத்தே பயணிக்குமா?

தமிழக அரசியலின் அடுத்த கூட்டணி மேப் செப்.9ல் தான் தெளிவாகப் போகிறது!