விஜய் முன்னிலையில் கண்ணீர் விட்ட சத்யபாமா.. பிரசாரத்தில் பரபரப்பு!

சென்னை: தாராபுரம் இடைத்தேர்தல் பிரசாரத்தில் தவெக வேட்பாளர் சத்யபாமா கண்ணீர் விட்டு பேசிய சம்பவம் தற்போது அரசியல் மற்றும் சமூக வலைதளங்களில் பேசுபொருளாகியுள்ளது. முதலமைச்சர் விஜய் பங்கேற்ற பொதுக்கூட்டத்தில், தன்னைப் பற்றி அவதூறாகவும், ஆபாசமாகவும் விமர்சிப்பதாகக் கூறிய சத்யபாமா உணர்ச்சிவசப்பட்டு கண்ணீர் விட்டார். இதையடுத்து விஜய் அவருக்கு மேடையிலேயே ஆறுதல் தெரிவித்தார்.

தாராபுரம் தொகுதியில் அதிமுகவில் இருந்து விலகி தவெக சார்பில் சத்யபாமா போட்டியிடுகிறார். அவருக்கு எதிராக திமுக, அதிமுக, நாம் தமிழர் கட்சி உள்ளிட்ட வேட்பாளர்கள் களத்தில் உள்ளனர். தேர்தல் பிரசாரத்தின்போது சத்யபாமாவுக்கு எதிர்ப்பு ஏற்பட்டதாகவும், சில இடங்களில் வாக்குவாதங்கள் நடந்ததாகவும் செய்திகள் வெளியாகியுள்ளன.

இந்தச் சூழலில் விஜய்யின் பிரசாரக் கூட்டத்தில் சத்யபாமா பேசியபோது, கடந்த சில வாரங்களாக சமூக வலைதளங்களில் தன்னைப் பற்றி கடுமையாக விமர்சிப்பதாகக் கூறினார். “நான் எந்தத் தவறும் செய்யவில்லை” எனக் கூறியபோது அவர் கண்ணீர் விட்டார். தனது அரசியல் முடிவு குறித்து விளக்கமளித்த அவர், தொகுதி மக்களுக்கு நல்லது செய்ய வேண்டும் என்ற நோக்கத்திலேயே தவெகவில் இணைந்ததாகவும் தெரிவித்தார்.

இதற்கிடையே, சத்யபாமா பேசிக்கொண்டிருந்தபோது அமைச்சர் ராஜ்மோகனுக்கு செல்போன் அழைப்பு வந்ததும், அதன்பின்னர் அவர் சத்யபாமாவிடம் ஏதோ கூறிய காட்சிகள் சமூக வலைதளங்களில் பரவின. அதன் பின்னரே சத்யபாமா உணர்ச்சிவசப்பட்டதாகக் கூறி, சிலர் இது முன்கூட்டியே திட்டமிடப்பட்ட நிகழ்வா என கேள்வி எழுப்பி வருகின்றனர். இந்த வீடியோ தொடர்பாக சமூக வலைதளங்களில் பல்வேறு மீம்ஸ்களும் விமர்சனங்களும் பரவி வருகின்றன.

இதற்கு பதிலளித்த அமைச்சர் ராஜ்மோகன், வெயிலில் நீண்ட நேரமாக மக்கள் மற்றும் தலைவர்கள் இருந்ததால், சத்யபாமாவிடம் உரையை விரைவாக முடிக்குமாறு மட்டுமே கூறியதாக விளக்கம் அளித்துள்ளார். எந்தவித அரசியல் நோக்கத்துடனும் அவர் கூறவில்லை என்றும் தெரிவித்துள்ளார்.

இதனால் சத்யபாமாவின் கண்ணீர் பேச்சு உணர்ச்சிகரமான தருணமா அல்லது அரசியல் சர்ச்சையாக மாறிய நிகழ்வா என்ற விவாதம் தொடர்ந்து வருகிறது. அக்டோபர் 6ஆம் தேதி வாக்குப்பதிவு நடைபெற உள்ள நிலையில், இந்த விவகாரமும் தாராபுரம் தேர்தல் பிரசாரத்தில் முக்கிய பேசுபொருளாகியுள்ளது.