பிரிட்டன் போக பாஸ்போர்ட் ஆபிஸ் போன விஜய்.. முழு பின்னணி!

முதல்வர் விஜய், தனது பிரிட்டன் பயணத்திற்கு முன்னதாக நேற்று சென்னை மண்டல பாஸ்போர்ட் அலுவலகத்திற்கு நேரில் சென்று விண்ணப்பித்த நிகழ்வு அரசியல் களத்திலும் சமூக வலைதளங்களிலும் பெரும் விவாதப் புள்ளியாக மாறியுள்ளது.

முதல்வர் பொறுப்பேற்ற பிறகு அவர் மேற்கொள்ளும் முதல் வெளிநாட்டுப் பயணம் இது என்பதால், எதற்காக அவர் திடீரென பாஸ்போர்ட் அலுவலகத்திற்கு நேரில் செல்ல வேண்டும் என்ற கேள்விகள் பரவலாக எழுந்தன. ஆனால், இதன் பின்னணியில் இருப்பது எந்தவித வழக்கமான நடைமுறையோ அல்லது தாமதமோ அல்ல.. அவர் நாட்டின் மிக உயரிய அந்தஸ்து கொண்ட 'மெரூன் பாஸ்போர்ட்' எனப்படும் தூதரக பாஸ்போர்ட்டைப் பெறுவதற்காகவே அங்கு சென்றார் என்பது தெரியவந்துள்ளது.

விஜய் தலைமையிலான உயர்நிலைக் குழுவினர், தமிழகத்திற்குப் புதிய தொழில் முதலீடுகளை ஈர்க்கும் நோக்கில் பிரிட்டன் உள்ளிட்ட நாடுகளுக்கு அரசுமுறைப் பயணம் மேற்கொள்ளத் திட்டமிட்டுள்ளனர். உலகளாவிய முன்னணி தொழில் நிறுவனங்களின் தலைவர்களைச் சந்திப்பது, புதிய புரிந்துணர்வு ஒப்பந்தங்களை மேற்கொள்வது மற்றும் தொழில் முதலீட்டு மாநாடுகளில் பங்கேற்பது ஆகியவற்றை இலக்காகக் கொண்டு இந்தப் பயணம் அமையவுள்ளது. ஒரு மாநிலத்தின் முதல்வர் வெளிநாடுகளுக்கு அரசுமுறைப் பயணமாகச் செல்லும்போது, அவர் மாநிலத்தின் பிரதிநிதியாக மட்டுமன்றி, நாட்டின் அதிகாரப்பூர்வ தூதராகவும் கருதப்படுகிறார். அதனால்தான், அவருக்கு இந்த பிரத்யேக மெரூன் பாஸ்போர்ட் வழங்கப்படுகிறது.

வழக்கமான சாதாரண குடிமக்களுக்கு வழங்கப்படும் அடர் நீல நிற பாஸ்போர்ட்டை விட, தூதரக பாஸ்போர்ட் முற்றிலும் மாறுபட்ட விதிகளைக் கொண்டுள்ளது. மத்திய வெளியுறவு அமைச்சகத்தின் நேரடி வழிகாட்டுதலின் கீழ் மட்டுமே இது வழங்கப்படும். முதல்வர் அந்தஸ்தில் இருக்கும் நபர்களுக்கு ஏற்கனவே சாதாரண பாஸ்போர்ட் இருந்தாலும், அரசுமுறைப் பணிகளுக்காக வெளிநாடு செல்லும்போது தூதரக பாஸ்போர்ட்டைப் பயன்படுத்துவது சர்வதேச நெறிமுறையாகும். இதற்கான தனிப்பட்ட ஆவணச் சரிபார்ப்பு, பயோ மேட்ரிக்ஸ் தரவுப் பதிவு மற்றும் அதிகாரப்பூர்வ கையொப்ப நடைமுறைகளை நிறைவு செய்வதற்காகவே விஜய் நேற்று பாஸ்போர்ட் அலுவலகத்திற்கு நேரில் சென்று அதிகாரிகளைச் சந்தித்தார்.

இந்த நடவடிக்கை முடிவடைந்ததைத் தொடர்ந்து, முதலமைச்சரின் வெளிநாட்டுப் பயணத்திற்கான அரசு ஆவணப் பணிகள் இறுதிக் கட்டத்தை எட்டியுள்ளன. தமிழகத்திற்கான சர்வதேச முதலீட்டு வாய்ப்புகளை விரிவுபடுத்தும் இந்தப் பயணம், அரசு நிர்வாக ரீதியாகவும் அரசியல் ரீதியாகவும் முக்கியத்துவம் வாய்ந்த ஒன்றாகப் பார்க்கப்படுகிறது.

இந்தியாவில் வழங்கப்படும் பாஸ்போர்ட்டுகள் அவற்றின் பயன்பாடு மற்றும் அதிகாரப்பூர்வ அந்தஸ்தின் அடிப்படையில் மூன்று வண்ணங்களாகப் பிரிக்கப்பட்டுள்ளன: நீல நிறம் (பொதுமக்கள்), வெள்ளை நிறம் (அரசு ஊழியர்கள் மற்றும் அலுவல் பணி) மற்றும் மெரூன் நிறம் (தூதரக பாஸ்போர்ட்).

மெரூன் நிற பாஸ்போர்ட் என்பது இந்திய வெளியுறவு அமைச்சகத்தால் மிக முக்கிய பிரமுகர்களுக்கு மட்டுமே வழங்கப்படும் உயரிய பயண ஆவணமாகும்.

இந்தியக் குடியரசுத் தலைவர், துணை குடியரசுத் தலைவர், பிரதமர், மத்திய அமைச்சர்கள், உச்ச நீதிமன்ற நீதிபதிகள், மாநிலங்களின் முதலமைச்சர்கள், நாடாளுமன்ற உறுப்பினர்கள் மற்றும் இந்திய வெளியுறவுப் பணி (IFS) அதிகாரிகளுக்கு மட்டுமே இது வழங்கப்படுகிறது.

1961-ஆம் ஆண்டின் வியன்னா சர்வதேச உடன்படிக்கையின்படி (Vienna Convention), இந்த பாஸ்போர்ட்டை வைத்திருப்பவர்கள் வெளிநாடுகளில் சிறப்பு தூதரக பாதுகாப்பைப் பெறுகிறார்கள். அவர்கள் மீது பிற நாடுகளில் தன்னிச்சையாகக் குற்றவியல் அல்லது சிவில் வழக்குகள் தொடரவோ, கைது செய்யவோ முடியாது.

உலகின் பெரும்பாலான நாடுகளுக்கு இந்த பாஸ்போர்ட் வைத்திருப்பவர்கள் செல்வதற்கு முன்கூட்டியே விசா எடுக்கத் தேவையில்லை இந்த பாஸ்போர்ட் தனிநபர் சுற்றுலாவுக்காகப் பயன்படுத்த முடியாது. மத்திய அரசின் அனுமதிக்கப்பட்ட அதிகாரப்பூர்வ அரசுமுறைப் பயணங்களுக்கு மட்டுமே இது செல்லும்.