'மனசாட்சியே இல்லாத நிறுவனம்' - சௌமியா அன்புமணி பேச்சு

தமிழக சட்டப்பேரவையில் என்எல்சி நிறுவனத்தின் செயல்பாடுகளை பாமக சட்டமன்றக் குழுத் தலைவர் சௌமியா அன்புமணி கடுமையாக விமர்சித்தார். விவசாயிகளிடம் இருந்து நிலங்களை கையகப்படுத்திவிட்டு, அவர்களுக்கே வேலைவாய்ப்பு வழங்காமல் வெளிமாநிலத்தினரை பணியில் சேர்ப்பதாக அவர் குற்றம்சாட்டினார்.

சட்டப்பேரவையில் பேசிய சௌமியா அன்புமணி, தமிழகத்தில் மனசாட்சியே இல்லாமல் செயல்படும் நிறுவனம் என்று கூற வேண்டுமென்றால் அது என்எல்சி நிறுவனம்தான் என விமர்சித்தார். விவசாயிகளின் நிலங்கள் ஒரே இரவில் கையகப்படுத்தப்பட்டதாகவும், இதனால் உள்ளூர் மக்களின் வாழ்வாதாரம் பாதிக்கப்பட்டதாகவும் அவர் தெரிவித்தார்.

மேலும், நிலத்தடி நீரை அதிக அளவில் பயன்படுத்துவதால் விவசாய நிலங்கள் பாதிக்கப்படுவதாகவும் சௌமியா அன்புமணி குற்றம்சாட்டினார். நிலத்தை வழங்கிய பூர்வீக மக்களுக்கு வேலைவாய்ப்பு வழங்காமல், நுழைவுத் தேர்வு உள்ளிட்ட நடைமுறைகள் மூலம் வெளிமாநிலங்களைச் சேர்ந்தவர்களை பணியில் தேர்வு செய்வதாகவும் அவர் புகார் தெரிவித்தார்.

என்எல்சி நிறுவனம் தொடர்ந்து தவறான தகவல்களை வழங்குவதாகவும், சமூகப் பொறுப்புணர்வு நிதியை பொதுமக்களின் நலனுக்காக முழுமையாக பயன்படுத்தவில்லை என்றும் அவர் குற்றம்சாட்டினார். சாலை மற்றும் மேம்பாலப் பணிகள் மேற்கொள்ளப்பட்டதாக கூறப்பட்டாலும், அவற்றில் பெரும்பாலானவை நிறுவன வளாகத்துக்குள்ளேயே இருப்பதாகவும் அவர் தெரிவித்தார்.

இதற்கு பதிலளித்த தொழில்துறை அமைச்சர் கீர்த்தனா, என்எல்சி நிறுவனம் தொடர்பாக தொடர்ந்து பல்வேறு புகார்கள் அரசின் கவனத்துக்கு வருவதாக தெரிவித்தார். விவசாயிகள் மற்றும் பொதுமக்களின் நலனில் அரசு அக்கறையுடன் செயல்பட்டு வருவதாகவும் அவர் கூறினார்.

தற்போதைய அரசு பொறுப்பேற்று மூன்று மாதங்களே ஆன நிலையில், விவசாயிகளின் கோரிக்கைகளை ஆய்வு செய்ய குழு அமைக்கப்பட்டுள்ளதாகவும் அமைச்சர் தெரிவித்தார். மேலும், அரசு சார்பில் முத்தரப்பு பேச்சுவார்த்தை நடைபெற்று வருவதாகவும், விவசாயிகளுக்கும் பொதுமக்களுக்கும் எதிராக அரசு ஒருபோதும் செயல்படாது என்றும் உறுதியளித்தார்.

இதனால் என்எல்சி விவகாரம் தொடர்பான விவாதம் சட்டப்பேரவையில் பரபரப்பை ஏற்படுத்தியது.