'தமிழ் அன்பை போதிக்காதா?' - மரிய வில்சனுக்கு சீமான் கண்டனம்!

தமிழக சட்டப்பேரவையில் நிதியமைச்சர் மரிய வில்சன் தமிழ் மொழி மற்றும் கிறித்தவ மதம் குறித்து பேசியதாக கூறப்படும் கருத்துகள் சர்ச்சையை ஏற்படுத்தியுள்ள நிலையில், நாம் தமிழர் கட்சியின் தலைமை ஒருங்கிணைப்பாளர் சீமான் கடும் கண்டனம் தெரிவித்துள்ளார். மேலும், அமைச்சர் தனது பேச்சுக்கு சட்டப்பேரவையிலேயே மன்னிப்பு கேட்க வேண்டும் என்றும் வலியுறுத்தியுள்ளார்.

சட்டப்பேரவையில் நிதிநிலை அறிக்கையை வாசிக்கும்போது தமிழ் வார்த்தைகளை சரியாக உச்சரிக்க அமைச்சர் தடுமாறியதாகவும், எண்களை வாசிப்பதிலும் தவறுகள் ஏற்பட்டதாகவும் சீமான் தனது அறிக்கையில் குறிப்பிட்டுள்ளார். இதனை சட்டமன்ற உறுப்பினர் ராஜேந்திரன் சுட்டிக்காட்டியபோது, அமைச்சர் அளித்த பதிலும் உடல்மொழியும் ஆணவத்தை வெளிப்படுத்தியதாக அவர் விமர்சித்துள்ளார்.

தன்னிடம் உள்ள தவறை ஏற்றுக்கொண்டு திருத்திக்கொள்வதே அரசியல் முதிர்ச்சி என்றும், அதற்கு பதிலாக தனது நிலைப்பாட்டை மாற்ற முடியாது என அமைச்சர் கூறுவது கண்டனத்திற்குரியது என்றும் சீமான் தெரிவித்துள்ளார்.

மேலும், “நான் பிறப்பால் கிறித்தவன்; கிறித்தவம் எனக்கு அன்பை போதித்தது. எவ்வளவு தமிழ் படித்தாலும் அன்பை போதிக்காது” என்ற கருத்தை அமைச்சர் தெரிவித்ததாக குறிப்பிட்ட சீமான், அதற்கு கடும் எதிர்ப்பு தெரிவித்துள்ளார்.

கிறித்தவம் அன்பை போதிக்கிறது என்று கூறுவது அமைச்சரின் உரிமை என்றாலும், தமிழ் மொழி அன்பை போதிக்காது என்று கூறுவதற்கு அவருக்கு உரிமை இல்லை என சீமான் தெரிவித்துள்ளார். திருக்குறளில் இடம்பெறும் அன்பு தொடர்பான கருத்துகளையும் அவர் சுட்டிக்காட்டியுள்ளார்.
“அன்பிற்கும் உண்டோ அடைக்குந்தாழ்”, “அன்பிலார் எல்லாம் தமக்குரியர்” போன்ற திருக்குறள் வரிகள் மூலம் அன்பின் பெருமையை தமிழ் உலகிற்கு எடுத்துரைத்துள்ளதாகவும், “யாதும் ஊரே யாவரும் கேளிர்” என்ற கணியன் பூங்குன்றனாரின் வரிகள் உலக சகோதரத்துவத்தை வெளிப்படுத்துவதாகவும் அவர் கூறியுள்ளார்.

அதேபோல், “பிறப்பொக்கும் எல்லா உயிர்க்கும்”, “பகுத்துண்டு பல்லுயிர் ஓம்புதல்” போன்ற கருத்துகளும் மனிதநேயம், சமத்துவம் மற்றும் பகிர்ந்து வாழும் பண்பை தமிழின் வழியாக எடுத்துரைப்பதாக சீமான் குறிப்பிட்டுள்ளார்.

மேலும், அனைத்து மதங்களும் அன்பையே போதிக்கின்றன என்பதை சுட்டிக்காட்டிய அவர், இயேசுநாதர், நபிகள் நாயகம், சைவத் திருமுறைகள், பாரதி, வள்ளலார் உள்ளிட்டோர் அன்பு மற்றும் கருணையை வலியுறுத்தியதை குறிப்பிட்டுள்ளார்.

தமிழகத்திற்கு வந்த கிறித்தவப் பாதிரியார்களான ஜி.யு.போப் மற்றும் வீரமாமுனிவர் ஆகியோர் தமிழ் மொழிக்கு ஆற்றிய பங்களிப்பையும் சீமான் நினைவுபடுத்தியுள்ளார். கிறித்தவ மதத்தைச் சேர்ந்தவர்களே தமிழுக்காக பெரும் பணிகளை செய்துள்ள நிலையில், தமிழ் அன்பை போதிக்கவில்லை என கூறுவது வரலாற்றுக்கு முரணானது என்றும் தெரிவித்துள்ளார்.

ஒருவரின் மதம் மாறக்கூடியதாக இருக்கலாம்; ஆனால் தாய்மொழியும் இன அடையாளமும் முக்கியமானவை என சீமான் வலியுறுத்தியுள்ளார். எனவே, தமிழை இழிவுபடுத்தும் வகையில் பேசுவது ஏற்றுக்கொள்ள முடியாதது என்றும், சட்டப்பேரவையில் அன்னைத்தமிழை அவமதிக்கும் வகையில் பேசியதாக கூறப்படும் கருத்துகளுக்காக அமைச்சர் மரிய வில்சன் அதே அவையில் மனம் வருந்தி மன்னிப்பு கேட்க வேண்டும் என்றும் சீமான் வலியுறுத்தியுள்ளார்.