கடன் ஏன் உயர்வு? விஜய் பதில் தர வேண்டும் - நயினார் நாகேந்திரன் கேள்வி

தமிழ்நாடு அரசின் 2026–27 ஆம் ஆண்டுக்கான முதல் பொது பட்ஜெட் சட்டப்பேரவையில் தாக்கல் செய்யப்பட்ட நிலையில், அதற்கு எதிராக பல்வேறு அரசியல் கட்சிகள் கடும் விமர்சனங்களை முன்வைத்து வருகின்றன. தமிழக வெற்றி கழகத்தின் தலைமையில் முதலமைச்சர் விஜய் ஆட்சி அமைந்த பிறகு வெளியான இந்த பட்ஜெட்டை நிதியமைச்சர் மரிய வில்சன் தாக்கல் செய்தார்.

இந்த பட்ஜெட்டில் முக்கிய துறைகளுக்கான நிதி ஒதுக்கீடு கடந்த ஆண்டை விட குறைக்கப்பட்டுள்ளதாக எதிர்க்கட்சிகள் குற்றம் சாட்டுகின்றன. குறிப்பாக பள்ளிக்கல்வித் துறைக்கான நிதி ரூ.48,534 கோடியில் இருந்து ரூ.44,527 கோடியாக குறைக்கப்பட்டதாகவும், உயர்கல்வி ரூ.8,505 கோடியில் இருந்து ரூ.8,393 கோடியாகவும், நீர்வளத்துறை ரூ.10,076 கோடியில் இருந்து ரூ.9,264 கோடியாகவும் குறைந்துள்ளதாக தெரிவிக்கப்பட்டுள்ளது. மேலும், எரிசக்தி, கைத்தறி மற்றும் துணிநூல் துறைகளிலும் நிதி குறைப்பு ஏற்பட்டுள்ளதாக கூறப்படுகிறது.

இந்த நிலையில் தமிழக பாஜக தலைவர் நயினார் நாகேந்திரன் கடும் கண்டனம் தெரிவித்துள்ளார். “முக்கிய துறைகளின் நிதியை குறைப்பது என்பது தரத்தில் சமரசம் செய்வதற்கு சமம். இது அரசு இயந்திரத்தின் செயல்திறனை பாதிக்கும்” என்று அவர் குறிப்பிட்டுள்ளார். மேலும், அரசின் கடன் அளவு ரூ.1.22 லட்சம் கோடியில் இருந்து ரூ.1.73 லட்சம் கோடியாக உயர்ந்திருப்பது பல்வேறு கேள்விகளை எழுப்புகிறது எனவும் கூறினார்.

“செலவினங்கள் குறைக்கப்பட்டிருந்தால், கடன் ஏன் அதிகரித்தது? மக்கள் நலத்திட்டங்களில் அரசு சலுகை செய்யிறதா? நிதி கசிவுகளை கட்டுப்படுத்துகிறோம் என்ற பெயரில் மக்கள் நலத்தில் பாதிப்பு ஏற்படுகிறதா?” என்ற கேள்விகளை எழுப்பிய அவர், இதுகுறித்து முதலமைச்சர் விஜய் மற்றும் சம்பந்தப்பட்ட அமைச்சர்கள் உடனடியாக விளக்கம் அளிக்க வேண்டும் என வலியுறுத்தினார்.

இந்த பட்ஜெட் குறித்து அரசும் எதிர்க்கட்சிகளும் இடையே விவாதம் மேலும் தீவிரமடையும் சூழல் நிலவுகிறது.