மீண்டும் தேர்தல் வந்தால் 180 சீட் வெற்றி: வைகோ அதிரடி பேச்சு

தூத்துக்குடி: தமிழகத்தில் மீண்டும் தேர்தல் நடத்தப்பட்டால் தமிழக வெற்றி கழகத் தலைவர் மற்றும் முதலமைச்சர் ஜோசப் விஜய் 180க்கும் மேற்பட்ட தொகுதிகளில் வெற்றி பெறுவார் என மக்கள் மனநிலை இருப்பதாக மதிமுக பொதுச் செயலாளர் வைகோ தெரிவித்துள்ளார். கள நிலவரமும் அதற்கே ஆதரவாக உள்ளது எனவும் அவர் வலியுறுத்தினார்.

தூத்துக்குடி மாவட்டம் கோவில்பட்டி அருகே உள்ள பகுதிகளில் சீமை கருவேல மரங்களை அகற்றும் நிகழ்ச்சியில் கலந்து கொண்ட வைகோ, பின்னர் செய்தியாளர்களிடம் பேசினார். பல ஆண்டுகளாக சுற்றுச்சூழல் மற்றும் விவசாயம் சார்ந்த பிரச்சினைகளில் தொடர்ந்து போராடி வருவதாகவும், ஸ்டெர்லைட், முல்லைப்பெரியாறு அணை, நியூட்ரினோ திட்டம் உள்ளிட்ட பல்வேறு பிரச்சினைகளில் சட்ட ரீதியாகவும் கள ரீதியாகவும் போராட்டங்களை முன்னெடுத்ததாகவும் கூறினார்.

மேலும், கர்நாடகாவின் மேகதாது அணை திட்டத்துக்கும் கடுமையாக எதிர்ப்பு தெரிவித்ததாகவும், அது தமிழகத்தின் பல மாவட்டங்களை பாதிக்கும் என எச்சரித்தார். சீமை கருவேல மரங்களை முழுமையாக அகற்ற தமிழக அரசு போர்க்கால நடவடிக்கை எடுக்க வேண்டும் என்றும் வைகோ கோரிக்கை விடுத்தார்.

அதனைத் தொடர்ந்து தற்போதைய அரசியல் சூழல் குறித்து பேசிய அவர், தமிழகத்தில் முன்பு நிலவிய ஊழல் சூழலை குறைத்து மக்களுக்கு நம்பிக்கை அளித்தவர் விஜய் என குறிப்பிட்டார். இதனால் மக்களிடையே அவருக்கு பெரும் ஆதரவு உருவாகி இருப்பதாகவும் தெரிவித்தார்.

மீண்டும் தேர்தல் நடந்தால் மக்கள் விஜய்யை பெரும்பான்மையுடன் தேர்வு செய்வார்கள் எனவும், 180க்கும் மேற்பட்ட இடங்களில் வெற்றி பெறும் சூழல் நிலவுகிறது எனவும் வைகோ உறுதியாக தெரிவித்தார். தற்போதைய அரசியல் சூழலில் தவெக தலைமையிலான கூட்டணியில் மதிமுக இணைந்திருப்பதும் குறிப்பிடத்தக்கது.