கோவிலில் இனி ரோபோ சாமியார் - ஜப்பானின் ஆன்மீகப் புரட்சி!

2026-ம் ஆண்டில் நாம் கற்பனை செய்ததை விடவும் செயற்கை நுண்ணறிவு (ஏ.ஐ) நம் வாழ்வோடு கலந்துவிட்டது. ஆனால், ரோபோவிடம் போய் நாம் ஆசிர்வாதம் வாங்குவோம் என்று என்றாவது நினைத்திருப்போமா? ஜப்பானின் கியோட்டோ பல்கலைக்கழக ஆராய்ச்சியாளர்கள் அதை உண்மையாக்கியுள்ளனர். அவர்கள் உருவாக்கியுள்ள "புத்தாராய்டு" (Buddharoid) என்ற ஏ.ஐ ரோபோ உலகையே உற்றுநோக்க வைத்திருக்கிறது.

இது வெறும் இயந்திரம் அல்ல; பௌத்த மதக் குருவைப் போலவே உடை உடுத்தி, அதே போன்ற உடல் அசைவுகளுடன் (Humanoid) செயல்படும் அதிநவீன ரோபோ. இதில் பொருத்தப்பட்ட செயற்கை நுண்ணறிவு தொழில்நுட்பம், மனிதர்கள் கேட்கும் தத்துவார்த்தமான கேள்விகளுக்கும், தனிப்பட்ட சந்தேகங்களுக்கும் மிகத் துல்லியமாகப் பதிலளிக்கும் வல்லமை கொண்டது.

ஜப்பானில் ஒரு வினோதமான சிக்கல் நிலவுகிறது. அங்குள்ள இளைஞர்கள் யாரும் மதக் குருக்களாகப் பணியாற்ற விரும்புவதில்லை. இதனால் பல கோவில்கள் வாரிசுகள் இன்றி மூடும் நிலைக்குத் தள்ளப்பட்டுள்ளன. மறுபுறம், ஜப்பானின் முதியோர் மக்கள் தொகை அதிகரித்து வருவதால், அவர்களுக்கு ஆன்மீக ஆறுதல் கூற ஆட்கள் தேவைப்படுகிறார்கள். இந்த 'கேப்'-ஐ நிரப்பவே கியோட்டோ பல்கலைக்கழகம் இந்த ரோபோ சாமியாரை களம் இறக்கியுள்ளது.

கோவிலுக்கு வருபவர்களுடன் சகஜமாகப் பேசும். வாழ்க்கைப் பிரச்னைகளுக்குப் புத்த மதக் கொள்கைகளின் அடிப்படையில் தீர்வு சொல்லும். பௌத்த வழக்கப்படி குனிந்து வணங்குதல் (Bowing) மற்றும் பிரார்த்தனை செய்தல் போன்ற அசைவுகளைச் செய்யும்.

"ஒரு மெஷினால் எப்படி மனித உணர்வுகளைப் புரிந்துகொள்ள முடியும்?" என்ற பெரிய கேள்வியை இந்தத் திட்டம் எழுப்பியுள்ளது. ஆனால், விஞ்ஞானிகள் இதில் ஒருபடி மேலே சென்றுள்ளனர். எதிர்காலத்தில் கல்வி, கவுன்சிலிங் மற்றும் ஆன்மீக ஆதரவு போன்ற உணர்வுபூர்வமான துறைகளில் ரோபோக்கள் எப்படி உதவ முடியும் என்பதற்கான முன்னோட்டமாகவே இது பார்க்கப்படுகிறது.

ஜப்பான் ஏற்கனவே ரோபோ துறையில் கில்லாடி என்பது நமக்குத் தெரியும். ஆனால், கலாச்சாரத்தையும் நவீனத்தையும் இப்படி இணைப்பது இதுவே முதல்முறை. ஒரு மனித குருவிற்கு இது முழுமையான மாற்றாக இல்லாவிட்டாலும், அடிப்படை ஆன்மீகத் தேவைகளுக்கு ஒரு சிறந்த உதவியாளராக இது இருக்கும் என்பதில் ஐயமில்லை.

பழமையான பாரம்பரியத்தை டெக்னாலஜி மூலம் காப்பாற்ற ஜப்பான் எடுத்துள்ள இந்த முயற்சி, வருங்காலத்தில் பல நாடுகளில் எதிரொலிக்கக்கூடும். சாமியார் ரோபோவிடம் ஆசி வாங்கும் காலம் வெகுதூரத்தில் இல்லை.